1401



1405




1410




1415




1420




1425




1430

Guiburc meïsme sert sun seignur de l'aigue,
Puis l'ad assis a une basse table
- Ne pout aler pur doel a la plus halte -
Puis li aporte d'un sengler une espalle;
Li bers la prist, si la mangat en haste,
Il la fist tant, cum s'el fust mult aate.
El li aporte un grant pain a tamis
E desur cel dous granz gastels rostiz.
Si li aporte un grant poün rosti,
Puis li aporte grant mazelin de vin :
Od ses dous braz i out a sustenir.
Mangat Guillelmes le grant pain a tamis
E en apres les dous gasteals rostiz.
Trestut mangat le grant braün porcin
E a dous traiz but un sestier de vin,
E tut mangad les dous gasteals rostiz,
Si qu'a Guiburc unc mie n'en offrid,
Ne redresçad la chiere ne le vis.
Veit le Guiburc, crollad sun chief, si rist;
- Purquant plurat d'andous les oilz del vis -
Guillelme apele, en sun romanz li dist :
"Par Deu de Glorie, qui convertir me fist,
Qui rendrai l'alme de ceste peccheriz,
Quant ert li termes, al jur de grant juïs,
Qui si mangüe un grant pain a tamis,
Pur ço ne laisse les dous gasteals rostiz,
E tut mangüe un grant braün porcin
E en aproef un grant poün rosti,
E a dous traiz beit un sestier de vin,
Bien dure guere deit rendre a sun veisin !